സ്വാതന്ത്ര്യം...സ്വാതന്ത്ര്യം

സ്വാതന്ത്ര്യദിന ഘോഷങ്ങൾ മുഴങ്ങുന്നൂ,

കാതിൽ, 

അധികാര കൂടാരത്തിന്നക-

ത്തളത്തിൽ നിന്നും...

നിൽപ്പുണ്ടതിൻ പുറത്തായൊരു ജനത, 

തല ചായ്ക്കാനിത്തിരിയിടത്തിന്നായ് 

കേണു കൊണ്ടങ്ങിനെ...

ഭൂമിതന്നാദിമ ജന്മങ്ങളത്രേ, യിവർ 

ഭൂമിപാലരുടെ കണ്ണിലെ കരടാ-

യിന്നും നിലകൊള്ളുന്നവർ...! 

ഓർത്തുപോകുന്നു, സ്വാതന്ത്ര്യത്തി-

ന്നർത്ഥവും  അർത്ഥാന്തരങ്ങളും 

കാലമേറെ പിന്നിട്ടു നില്ക്കവേ...

ആണ്ടുകൾക്ക് മുൻപൊരുകൂട്ട-

മാളുകളൊന്നുചേർന്ന് സമരം ചെയ്തും, 

അടിയേറ്റു പുളഞ്ഞും, കാരാ-

ഗൃഹത്തിലമർന്നും വിളഞ്ഞും, 

സഹിച്ചും നേടിയെടുത്തോ-

രവകാശങ്ങളത്രയും തീറെഴുതുന്നൂ, 

നവ സാരഥികൾ, വൈദേശികര്ക്കായ്.

ഉള്ളവൻ  മാത്രമുണ്ടാൽ മതിയെന്നും 

ഉടുത്താൽ   മതിയെന്നും തിരുത്തുന്നൂ 

ജാതകം, നമ്മളാൽ തിരഞ്ഞെടുത്തവ-

രാലെന്നതും , കഷ്ടം.! ഇനിയെന്തെന്നല്ലോ 

ചോദിപ്പൂ ബഹുജനം, കൈവിട്ടു പോകു-

മവകാശങ്ങളെ യോർത്തും ശപിച്ചും...  

ആസുരതയാൽ പൊള്ളുമിക്കാലത്ത് 

ആയുധം കൊണ്ടേ മറുപടിയെന്ന്,

 ചിലർ പറയുമ്പോഴും, ഓർക്കുക  

കൊലയും, കൊള്ളിവെപ്പും കൊണ്ട് നേടാ-

നാകില്ല നേട്ടം, വേണ്ടത് മാറ്റമത്രെ 

നയിക്കുന്നവന്റെ മനോഭാവമത്രേ ..!    

നമ്മളെ ഭരിക്കാതെ, നമുക്കായ്, ഭരിക്കു-

മെളിയവനാം ഒരുവൻ വരുമോ..? 

കാളിയ വിഷ ദംശമേറ്റ് തമസ്സാൽ 

പുളയുമീ ജനത്തെയുണർത്തുവാൻ 

ഇല്ലായ്മയുടെ തൊഴുത്തിൽ നിന്നോ..

അസ്വാതന്ത്രത്തിന്നഴിക്കുള്ളിൽ നിന്നോ, 

ചുരുട്ടി പിടിച്ച മുഷ്ടിയും, 

ചാട്ടവാറും 

ഓടക്കുഴലുമായ് 

വരുമോ..വന്നെത്തുമോ..?

-ശശി കാട്ടൂർ.