മാഞ്ഞു പോകുന്നത്.

പാതിരാത്രിയിൽ 

നക്ഷത്ര കുഞ്ഞുങ്ങളെ 

പെറ്റു കൂട്ടുന്നു

കണ്ണുകൾ..

കണാമറയത്തിരുന്നു

വിവിധ താളത്തിൽ 

ചെറുജീവികളുടെ 

നാദമധുരിമ    

ഒരിളംകാറ്റ്, 

കാറ്റിലുലാത്തുന്ന 

പാൽ മണമുള്ള

നിലാവ്..

ഉലയൂതി തെളിയും പോലെ  

കുഞ്ഞു വെളിച്ചവുമായി 

തെന്നി തെന്നി പറക്കുന്ന 

മിന്നാമിന്നികൂട്ടങ്ങൾ 

 

യാത്രക്കുമുന്പേ, 

ഇനിയും മതിവരാത്ത 

ഈ കാഴ്ചയും കേൾവിയും പെറുക്കിയെടുത്ത് 

നാളെ

തൊട്ടുകൂട്ടാൻ പാകത്തിൽ 

മനസ്സിന്റെ ഭരണിയിൽ 

നനവോടെ ഇറക്കി വെക്കവെ 

വർഷങ്ങൾക്കുമുന്പേ അതിലടുക്കി വെച്ച 

കാടു പൂത്ത മലയും 

ആർക്കൊക്കെയോ വെള്ളം കൊടുക്കാൻ 

ആർത്തിയോടലഞ്ഞിരുന്ന പുഴയും

മരിച്ചുപോയവരെപ്പോലെ

പുറംലോകം നോക്കി 

നിലവിളിച്ചുകൊണ്ടേയിരിക്കുന്നു.!

-ശശി കാട്ടൂർ 

06.07.14