വർത്തമാനത്തിലെ വഴികൾ

നടക്കുക 

നോക്കരുത് പിന്നിലേക്ക്‌ നിങ്ങൾ  

പിന്നിലുണ്ട് ചരിത്രങ്ങൾ... 

എത്രയൊക്കെ മൂടിവെച്ചാലും 

കുറിക്കു കൊള്ളുന്ന സത്യങ്ങളായി 

നിങ്ങളെ, യവ വിളിച്ചെന്നിരിക്കും 

ഗതി മുടക്കിയെന്നിരിക്കും  

അറിവല്ല, ആയുധം  

നെഞ്ചളവും കൈക്കരുത്തും  

കാഴ്ചയിൽ പച്ചയും 

കർമ്മത്തിൽ കത്തിയും 

എന്നതത്രേ, യി-  

ക്കാലത്തിൻ പ്രമാണം.

വെളുക്കുന്നതിനു മുൻപൊ,രുവൻ  

തൂറിയിട്ടുപോയ മന്ത്രങ്ങളാണ് 

അധികാരത്തിലേക്കുള്ളോരെളുപ്പ വഴി

അത് മുറുകെ പിടിക്കണം, നടക്കണം.

അവസരങ്ങൾക്കൊത്തു 

വേഷഭൂഷാദികൾ മാറ്റണം

വർണ്ണങ്ങൾ നോക്കി 

വരിയുടക്കണം 

ബാങ്ക് വിളികൾക്കും, 

ശാന്തി മന്ത്രങ്ങൾക്കും മീതെ 

അശാന്തി അലയടിക്കട്ടെ..... 

മർഗ്ഗമല്ലല്ലൊ 

ലക്ഷ്യമല്ലേ, നമു-

ക്കിന്ന് പ്രധാനം.

-ശശി കാട്ടൂർ.

കൗമാര കൌതുകം

മാമ്പൂ പൂത്തു മണം പൊഴിഞ്ഞു 

മാദക ചന്ദ്രിക ചിരി ചൊരിഞ്ഞു 

പോയ കാലങ്ങളോർത്തു നമ്മൾ 

കണ്ണുകൾ കൊണ്ട് കഥ പറഞ്ഞു 

കൊയ്ത്തു കഴിഞ്ഞ പാടങ്ങളപ്പാടെ 

ആമ്പൽപ്പൂക്കളാൽ മതി മറന്നാടവേ,  

മുട്ടോളമെത്തും നിൻ പാവാടത്തു,മ്പൊന്നു  

കാറ്റിനോടോത്തു പാറി മറയവേ 

നാണമെന്തേ വിരിഞ്ഞതാ കണ്‍കളിൽ 

താണുപോയ മുഖാബ്ജം തുടുത്തതും, 

എന്തു ചന്തമാണിന്നുമെ,ന്നോർമ്മയിൽ

കണ്ടു, കോൾമയിർ കൊണ്ട് ഞാൻ നിന്നതും.. 

എത്ര ഹേമന്ത, മെത്ര ശിശിരങ്ങൾ 

എത്ര പൂക്കാലം,വിടര്ന്നു കൊഴിഞ്ഞതും 

എന്നോ പിരിഞ്ഞു പോയിരുധ്രുവങ്ങളിൽ   

ചെന്നു ചേർന്നു നമ്മളോരോ ഗൃഹങ്ങളായ്    

വീണ്ടുമിന്നീ നിലാവിൽ പരസ്പ്പരം 

കണ്ണിൽ  കണ്ണിലായ് നോക്കിയിരിക്കവെ, 

ഒന്ന് തൊട്ടു നോക്കീടുവാൻ കൌതുകം 

പെണ്ണെ, പരിഭവം കാട്ടീടുകില്ലെങ്കിൽ 

നോക്കു നീയെൻ മുഖത്തേക്കു വീണ്ടും,  

പൂത്തു നില്ക്കുമാ കൌമാരം കണ്ടുവോ   

ഒന്ന് തൊട്ടു നോക്കീടുവാൻ കൌതുകം 

പെണ്ണെ, പരിഭവം കാട്ടീടുകില്ലെങ്കിൽ.

-ശശി കാട്ടൂർ 

ആഗോളീകരണ കാലത്തെ ജീവിതം.

രണ്ടു പെണ്‍തുടകൾക്കിടയിൽ നിന്ന് 

ഊരിപ്പോരുക എന്നത് 

ഏറെ ദുഷ്ക്കരമാണ്, 

മാംസളമാണവ, അത് 

നമ്മെ പ്രലോഭിപ്പിക്കും 

വർണ്ണ വൈവിധ്യങ്ങളുടെ കാഴ്ചകൾ 

കാട്ടിത്തരാമെന്ന്... 

മനസ്സൊന്ന് തെന്നിയാൽ 

തീർച്ചയാണ് 

അത് നമ്മെ വീഴ്ത്തിക്കളയും 

നെഞ്ചിനു നേരെ 

കാഞ്ചി വലിക്കുന്നവനെക്കുറിച്ച് 

നമ്മൾ മറക്കും 

ശ്വസിക്കുന്ന വായുവിനെക്കുറിച്ചും 

കുടിക്കുന്ന വെള്ളത്തെക്കുറിച്ചും

മറുത്തൊന്നും പറഞ്ഞെന്നു വരില്ല 

സുഹൃത്തെ കരുതിയിരിക്കുക 

നമുക്കിടയിലൂടെയുള്ള 

അതിന്റെ സഞ്ചാരം. 

-ശശി കാട്ടൂർ.

സൈലന്റ് അറ്റാക്ക്‌

നിനക്കെന്നെ, യൊന്ന്   

വിളിക്കാമായിരുന്നില്ലെ 

സമയമേറെ വൈകിപ്പോയ് 

വിളിച്ചാലും, കേൾക്കാൻ 

കഴിയാത്തത്ര 

ദൂരയാണ് ഞാനിപ്പോൾ 

ഒരലർച്ചയുണ്ട്, മുട്ടി-

ത്തിരിയുന്നു നിന്റെ ഉള്ളിൽ 

കാണുന്നു ഞാൻ .....

കരയരുതെന്ന് 

കണ്ണ് തുടക്കാൻ 

കൈ പൊന്തുന്നേ-

യില്ല പെണ്ണേ.  

നിത്യവും 

ഉണർന്നെണീറ്റാൽ 

ആദ്യം 

വിളിക്കുന്നത്‌ നിന്നെ 

സമയമറിയാതുറങ്ങിപ്പോകിലോ  

നിന്റെയൊരു വിളിക്ക് 

കാതോർത്തിരുന്നു 

പലപ്പോഴും ഞാൻ

 

മേച്ചൂടകലും മുൻപേ  

ഒന്ന് നീ വിളിച്ചിരുന്നെങ്കിൽ 

ഒരു പക്ഷെ, ഞാ-

നുണർന്നിരുന്നേനെ

നീയതറിയുന്നുവോ .....!

-ശശി കാട്ടൂർ 

വഴി തെറ്റി വരുന്നത്

വഴി തെറ്റി വന്നൊരു കാറ്റാണ് നീ 

മിഴിയിൽ 

ഒളിയമ്പ് പെയ്തൊരു നോവാണ് നീ.

 

ചെളിയിലൊരു സൂര്യൻ 

മിന്നി തെളിയവെ

പുളകിത ഹർഷയായ് 

വിടരുന്ന മൊട്ടു പോൽ  

എന്നെയും തഴുകി തലോടി,യുണർത്തി  

ഒന്നായെടുത്തു പോകു,ന്നതെങ്ങാണ് നീ.

ദൂരെയായ് കാണുന്നു പൊൻതാരകം 

നേരിൽ, 

ഇരുളിൽ വെളിച്ചമായ്  

പൊള്ളി പിടയുന്നു.

   

ഞാനൊന്ന് തൊട്ടോട്ടെ,യാ മൃദു സ്മേരത്തിൽ  

വാനവും ഭൂമിയുമൊന്നാകും വേളയിൽ.

മുറുകെ പിടിക്കുക, കൈവിരൽത്തുമ്പിൽ നീ 

ഉറവയായൊഴുകട്ടെ, സപ്ത സ്വരങ്ങളും.  

നിന്നിൽ നിറഞ്ഞു ഞാൻ പാടട്ടെ, 

എന്നിലെ, 

ആരാമ വാടിക തളിരിട്ടു നിൽക്കട്ടെ

ആരാധികേ , 

നമ്മൾ 

നമ്മെയറി, ഞ്ഞറിയും വരേയ്ക്കും.

-ശശി കാട്ടൂർ