ഉണർവ്

വഴി നിറയെ മഴയാണ് 

പുഴയൊഴുകിയ വഴിയാണ് 

കളിവഞ്ചിയിറക്കുവാൻ 

കടലാസ്  തേടി ഞാൻ 

കടലാഴത്തിലേക്ക് 

കയറൂരി പോകയാണ് 

ചിത്രത്തിൽ കണ്ടപ്പോൽ തന്നെ-

യുണ്ടീ നഗരം 

രാവും പകലും ഒരുമിച്ചു 

നൃത്തം വെക്കുന്നു.

പുലരിയിൽ പൂത്ത മര-

ക്കൊമ്പിലാടുന്നു പ്രണയം 

നനുത്ത ചിറകടിച്ചു പറക്കാൻ 

വെമ്പി നിൽക്കും കിളികൾ 

ആറ്റുനോറ്റുണ്ടായോ-

രുണ്ണികളൊക്കെയും 

മണ്ണിൽ പാതകത്തിൻ 

നിറങ്ങൾ ചാലിക്കുന്നു.

ഒച്ചയുണ്ടാക്കാതെ,  പതുങ്ങി 

വരുന്നു നിയമം, കയ്യിലൊരു 

വാറോല പോലുമില്ലാതെ

കണ്ണിമകൾ പൂട്ടാതെ .

കാത്തുവെച്ചൊരു കൈത-

പൂവുണ്ടെന്റെ കയ്യിൽ 

വഴി തെറ്റാതെ മടങ്ങി 

വരാമെന്ന വാക്കോടെ..

കാട്ടുതേനിൻ നിണം ചുരത്തി 

കാത്തിരിപ്പുണ്ടൊരുവൾ 

തേക്കുപ്പാട്ടിഴഞ്ഞുപ്പോയ 

പാടവരമ്പിലിപ്പോഴും 

കരിമരുന്നു പൂത്തുനിൽക്കും

കവിതേ നിൻ ഗുഹാമുഖത്തൂടേ 

കറുകറുത്തൊരുടലുമായി  

പുനർജ്ജനി ഞാൻ നൂഴട്ടെയോ.

-ശശി കാട്ടൂർ.