എന്താണിത്രമേൽ വിഷാദം നിനക്ക്
പിന്നിൽ നിന്നൊരാൾ വിളിച്ചുചോദിക്കെ,
തിരിഞ്ഞു, "ഇല്ലല്ലോ ചങ്ങാതീ.."
പുഞ്ചിരിച്ചു, മറുപടി ചാർത്തി ഞാൻ
എങ്കിലും ഉള്ളിലുണ്ടൊരു നീറ്റൽ
ഊറിക്കൂടും കാർമേഘം കണക്കിനെ...
"നുണ പറയരുതെന്നോട്
കാണാം, നിന്റെയുള്ളിൽ
പുകയുന്നുണ്ടൊരു കൂട്ടം.."
മുഖത്തു ചൂണ്ടി പറയുകയാണയാൾ
അത്ഭുതപ്പെട്ടു ഞാൻ
ദൈവമോ, മന്ത്രവാദിയോ,
മന:ശാസ്ത്രജ്ഞനോ... നിങ്ങളാരെന്റെ
മനസ്സ് വായിക്കുവാൻ....?
കേട്ടപാടെ പൊട്ടി,ച്ചിരിയുയരുന്നു
കാട്ടാളൻ, കേട്ടിട്ടില്ലേ
ഉണ്മയുടെ പുറ്റിലൊളിച്ഛവൻ
പ്രണയ സുരഭിലമീയൂഴിയിൽ
പ്രപഞ്ച ദു:ഖങ്ങളേറ്റു വാങ്ങി
കെടാക്കിനാവു കണ്ടു നടക്കും
കാലസ്വരൂപൻ,കവിതയുടെ
കാമുകൻ.
ശശി കാട്ടൂർ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ