ദൈവത്തെ തേടുന്നവർ.

തെരുവിൽ ഉറങ്ങുന്നുണ്ടൊരമ്മ

ഇരുപുറവും 

ചാവാലി നായ്ക്കളുടെ സംരക്ഷണയോടെ   

തെരുവ് മക്കളുടെ സ്വപ്നങ്ങളത്രയും 

തലയിണയാക്കിചമച്ചുക്കൊണ്ട്..

കൊട്ടാര സദൃശമായ കെട്ടിടത്തിൽ 

കെട്ടിലമ്മയെപ്പൊലെ മറ്റൊരമ്മ 

ആട്ടവും പാട്ടും , ഉപദേശങ്ങളുമായി 

ദൈവത്തിലേക്കുള്ള വഴി നടക്കുന്നു 

ജനങ്ങളായ ജനങ്ങളും 

ജനപ്രതിനിധികളും

പാട്ട് കേട്ട കെട്ടിടത്തിലേക്ക് 

മുട്ടിലിഴഞ്ഞു പോകുന്നു....

തെരുവിലെ അമ്മയുടെ 

കയ്യിലുണ്ടൊരുണ്ണി

ആരോ പെറ്റിട്ടു പോയ

ജാര സന്തതിയാകാം 

തെരുവിലെ അമ്മയൊരു  

താരാട്ട് പാട്ടാകുമ്പോൾ  

ഉണ്ണിയുടെ പാൽ ചുണ്ടിൽ വിരിഞ്ഞു നില്ക്കുന്നു 

കൊട്ടാരക്കെട്ടിലെ അമ്മതേടുന്ന 

നഗ്നനായ ദൈവം.

-ശശി കാട്ടൂർ