എന്റെ വാക്ക്

മിണ്ടാതിരിക്കാൻ വയ്യെനിക്കിനിയുമീ 

പണ്ടാരക്കാലന്മാർ അരങ്ങു വാണീടവേ 

വേണ്ടാ,യെനിക്കിനി ജാതി തന്നടയാള 

ചന്തങ്ങൾ,

കുന്തങ്ങളായെന്റെ നെഞ്ചു നീറ്റുമ്പോൾ..

സംഘർഷഭരിതമായീടുന്നു ഭൂതലം 

സംഘങ്ങളായീ മതങ്ങൾ മാറീടവേ   

ഒരിറ്റു വെള്ളത്തിനും തുണ്ടുറൊട്ടിക്കും  

കരിഞ്ഞു വാടീടുന്നു കുഞ്ഞുങ്ങൾ, മത- 

ഭ്രാന്തർ ഭരിക്കു-

മിടങ്ങളിലൊക്കെയും...

നഗ്നനാണ് രാജാവെന്നു പറയുവോന്റെ 

നാക്ക് പിഴുതെടുക്കുവാനെത്തുന്നു 

ആയുധധാരികൾ, 

തന്താങ്ങൾ ധരിക്കുന്നതു ശരിയെന്നു

ശടിക്കുന്ന മടയന്മാർ.....

ഒന്നായി പുലരുന്ന ജനതയെ, തമ്മിൽ പിണക്കി  

കാര്യം നേടുന്ന മാനവ വൈരികൾ, 

കാലത്തിനോട് കലഹിച്ചു 

നേടിയെടുത്ത നന്മകൾ തകർക്കും 

കാലന്മാർ .

മനുഷ്യരോടല്ല,

പ്രകൃതിയോടല്ല, കടപ്പാടിവർക്ക് 

പാഷാണ ഭാഷണം കൊ-

ണ്ടേഷണി കൂട്ടി 

ശാന്ത ജീവിതം തകിടം മറിക്കും 

ആന്ത്യ വർണ്ണങ്ങളോടത്രേ... 

ആട്ടിയോടിക്കുക ദൂരേക്ക്‌, ദൂരേക്ക്‌..

ആട്ടിയോടിക്കുകീ ദുരാത്മാക്കളെ 

മനുഷ്യ ജാതിയൊന്നായ് വാഴുമീ

മണ്ണിൽ നിന്നെന്നേക്കുമെന്നെക്കും.

-ശശി കാട്ടൂർ