കാമമോഹിതം.

മുടിയുള്ള വളെ , നീ 

മുടിയഴിച്ചിട്ടാടുമ്പോൾ, എന്റെ 

മൂടുപടം അഴിഞ്ഞു വീഴുന്നു 

കാട് കേറുന്നു ഞാൻ..

ആടാൻ മറന്ന പദ-

മൊന്നാടി, 

കടക്കണ്ണ്ക്കൊണ്ടെന്നെ

കടാക്ഷിക്കെ, 

ദീപ്തമാം 

മൌനത്തിൽ നിന്നുണരുന്നു

ഢമരുവിൻ താളം മുറുകുന്നു 

ഹിമശൈലങ്ങളിളകുന്നു   

കരുത്തിൻ തൃക്കണ്ണും 

ജടയും വിറക്കുന്നു 

പാതി വിടർന്ന നിൻ മിഴികളിൽ 

ആദിമ നാണം പിറക്കുന്നു

ഉടല് പൂക്കുന്നതിൻ 

സൌരഭ്യമൊഴുകുന്നു  

തുടല് പൊട്ടിച്ചെന്റെ-

യുള്ളം കൊതിക്കു,ന്നൊരു 

ചുടല നൃത്തത്തിനാവേഗമോടെ  

ഉടുപുടവയഴിച്ചേ ചൂടണം 

ഒടുങ്ങാത്ത ദാഹത്തിൻ 

പൂവുകളൊക്കെയും 

മുടിയുള്ളവളെ,

കറു കറുത്തവളേ, കാളീ 

എന്റെ മുടി പറിച്ചടിച്ചല്ലയോ നിൻ പിറവി

എന്നിട്ടും, മുടിയഴിച്ചിട്ടു നീ

വന്നു നില്ക്കെ 

പട്ടു പോകുന്നു മിഴികൾ, 

കാമത്താൽ 

തരളിതനാകുന്നുവല്ലോ ഞാൻ.

- ശശി കാട്ടൂർ