ഭൂമി കുലുങ്ങുമ്പോൾ

ഓർമ്മയുണ്ടോ സാറേ 

ഈ മുഖം 

മിനുമിനുത്ത വലിയ കാറിൽ 

സാറിരിക്കുമ്പോൾ, വഴിവക്കിൽ 

റോസാപ്പൂവൊന്നു നീട്ടി 

വേണോന്നു ചോദിച്ചത്...

ഓർമ്മയുണ്ടോ സാറേ..

ഓർമ്മയില്ലായിരിക്കും 

സാറെന്നെ, യന്ന് ശരിക്കൊന്നു 

നോക്കിയില്ലല്ലോ..

സാറേ...

ആ പൂക്കളത്രയും വിറ്റിട്ട് വേണായിരുന്നു 

എന്റെ താഴെയുള്ളതുങ്ങൾക്ക് 

കഴിക്കാൻ വല്ലതും വാങ്ങിക്കൊടുക്കാൻ 

എന്ത് ചെയ്യാം...വണ്ടിയുടെ 

ചില്ല് താഴ്ത്താൻപ്പോലും  

ഏവർക്കും  മടിയായിരുന്നു 

വണ്ടിക്കകത്തെ കുളിര് 

പറന്നു പോയെങ്കിലോ...?

ഒർമ്മയിലില്ലാ സാറെ, എ-

ന്നമ്മയെയോ അച്ഛനെയോ... 

കുളിരു പുതച്ചുറങ്ങുവാനൊരു 

കൊച്ചു വീടിനെയോ...

കരയരുത്, സാറെ- 

ഒന്ന് ചോദിക്കട്ടെ 

ഉടഞ്ഞു കിടക്കുമീ കൂറ്റൻ 

കെട്ടിടമായിരുന്നോ സാറിന്റെ വീട്...?

ആയിരിക്കും ...അല്ലെ..

ആയിരിക്കും 

കോണ്‍ക്രീറ്റ് കൂമ്പാരങ്ങൾക്കിടയിൽ 

തകർന്നു കിടക്കുന്ന 

ആ കാറിലല്ലേ, ഞാനന്ന് 

സാറിനെ കണ്ടത്.

-ശശി കാട്ടൂർ