ഉന്മാദി

ഒറ്റയ്ക്ക്, വെയിൽ നോക്കി 

ചുട്ടി കുത്താനിരിക്കുമ്പോഴാണ്

ചെണ്ടയും ചേങ്ങിലയുമായി

കാറ്റ് വന്നു വിളിച്ചത് .

വിളിച്ചപാടെ കൂടെ പോയ്‌...

കൈകോർത്തു ചൂളം വിളിച്ചു 

ഓലപമ്പരവും, ഓലപീപ്പിയുമായി 

ഓടിനടന്ന ഇടവഴികളിലൂടെ 

മറന്നതൊക്കെയും ചൂണ്ടിക്കാട്ടി 

വരണ്ട തൊണ്ടയോടെ  കാറ്റ് പറഞ്ഞു 

കാവിരുന്നിടം, കാലം  

കുടിയിരുന്നിടം 

മുവാണ്ടൻ മാവിന്റെ 

തണല് കൊള്ളാൻ കൊതിച്ച കാറ്റ് 

പച്ചമാങ്ങയിൽ ഉപ്പ് ചേർത്ത്  

എരിയുന്ന ഊഞ്ഞാലിലിരുത്തി വീശി 

തോട്ടു വക്കത്തെ

ചേറ്റു മണത്തെക്കുറിച്ചു പറഞ്ഞ് 

ഉച്ച വെയിൽ കായുന്ന 

വരാലിനെ പൊരിച്ചു തന്നു 

തുപ്പലാം കൊടിച്ചികളെ 

തുപ്പൽ കൊണ്ട് കൊതിപ്പിച്ചു... 

ചേറിൽ പുതഞ്ഞുപോയ ചക്രത്തെ

പാദമമർത്തി പുനർജ്ജനിപ്പിച്ചു  

വെയിൽ ചീളുകളിൽ വെട്ടി-

ത്തിളങ്ങും കതിര് കണ്ടു,  

കൊയ്ത്തരിവാളും പാട്ടുമായ് 

പണിയാളരെല്ലാം നിരന്നു 

പാടുക, പാടുക 

പാടെ മറന്ന വായ്ത്താരികൾ

കാറ്റൊന്നു കുലുങ്ങിച്ചിരിച്ചു 

ചിറകു തേടി പറന്നു പോകുന്നു 

ചിലങ്കയൊ ചങ്ങലയോ.... 

ചിതറിത്തെറിപ്പിച്ചതെന്നിൽ  

ഇനിയും മുറിപ്പാടുണങ്ങാത്ത

അടക്കമില്ലാത്തൊരെൻ ചിന്തയെ.

-ശശി കാട്ടൂർ 

18.02.15

Bahrain