അഭയം

അഭയം

എവിടെയാണഭയം,  എവിടെയും
 തിരക്കാണ് പതിവുപോൽ ...
സമചിത്തതയില്ലാതെ പായുന്ന പാതയോരങ്ങളിൽ നിൽപ്പുണ്ട് നിശ്ചലം
ഗാന്ധി,നാരായണഗുരു , വിവേകാനന്ദൻ, പ്രഗൽഭമതികളായുള്ളവർ

അതിന്നിടയിലൂടൊഴുകിയെത്തുന്നു ,
വാഗ്ദോരണികൾ
മതമഹത്വങ്ങളായ് അധികാരപ്പടവുകളേറുവാൻ   ആചാരവിചാരങ്ങളാൽ ആയുധം രാകുന്നു...

പ്രളയപ്പരവശതയിലൊരു മെയ്യായി
ഉയിർക്കൊണ്ട ജനതതി
പിരിയുന്നു,
ഓരോ മതകവാടത്തിലും

എവിടേക്കു പോകേണ്ടതെന്നറിയാതെ, ഒറ്റയായിപ്പോകുന്നു ഞാൻ.
ഒറ്റുകൊടുത്തവരാൽ മുറിപ്പെട്ടു കിടക്കുന്ന ധരണിയിൽ , നേര് ചേർത്തുപിടിക്കയാൽ ഒറ്റപ്പെട്ടവന് ...
ഭയമില്ലാത്തിതിരി നേരമിരിക്കുവാൻ,
തണല് തേടുന്നു...

എവിടെയാണഭയം,
നേര് കോർത്തു പിടിക്കുവാൻ
കൊതിക്കുന്ന കൈകളെ,
വരൂ ....
നമുക്കിവിടെയൊരു  ബോധി വൃക്ഷ ചുവടൊരുക്കാം ,
നേരിന്റെ പുലരി വിരിയട്ടെ,
ഭയമൊടുങ്ങട്ടെ.

- ശശി കാട്ടൂർ.